નરેન્દ્ર મોદી 3D ટેક્નોલોજીથી 4 ડિસેમ્બરે 52 સભા સંબોધશે

અમદાવાદ, 3 ડિસેમ્બર : ગુજરાત વિધાનસભા ચૂંટણી 2012ના ચૂંટણી પ્રચાર માટે ભાજપના આગામી કાર્યક્રમોની વિગત આપતા ભાજપના પ્રદેશ પ્રવક્તા આઈ કે જાડેજાએ જણાવ્યું છે કે ગુજરાતમાં યોજાનારી વિધાનસભાની ચૂંટણીમાં 3Dની આધુનિક ટેકનોલોજીના માધ્યમથી લાભ પાંચમના દિવસે ગુજરાતના મુખ્યમંત્રી નરેન્દ્રભાઈ મોદીએ રાજયના ચાર મહાનગરોમાં જનતા જનાર્દનને સંબોધન કર્યું હતું અને ચૂંટણી પ્રચારનો પ્રારંભ કર્યો હતો.

3D ટેકનોલોજીના માધ્યમથી ચૂંટણી પ્રચારના આગામી કાર્યક્રમોની વિગતો આપતા જાડેજાએ વધુમાં જણાવ્યું છે કે 4 ડિસેમ્બરના રોજ મુખ્યમંત્રી ગુજરાતમાં એક સાથે 52 સ્થાનો પર 3D ટેકનોલોજીના માધ્યમથી જાહેર સભાઓને સંબોધશે.

ગુજરાતની 52 વિધાનસભા બેઠકો પર એક સાથે 3Dની આધુનિક ટેકનોલોજીના માધ્યમથી લાખ્ખો પ્રજાજનોને ગુજરાતમાં ભાજપાની સરકારને પુનઃ સ્થાપતિ કરવા અને મોંઘવારી અને ભ્રષ્ટાચારનો ભોરિંગ સર્જનાર ર્કોંગ્રેસને જાકારો આપવા હાકલ કરશે.

તેઓએ અંતમાં જણાવ્યું છે કે 3D ટેકનોલોજીના માધ્યમથી મુખ્યમંત્રી નરેન્દ્રભાઈ મોદીએ 29 નવેમ્બરના રોજ 26 સ્થાનો પર એક સાથે સભાઓ સંબોધી હતી. 26 સ્થાનો પર બે લાખથી વધારે જનતા-જનાર્દને સભાઓમાં હાજરી આપી હતી. 3D ટેકનોલોજીના માધ્યમ દ્વારા મુખ્યમંત્રી નરેન્દ્રભાઈ મોદીના રેકોર્ડિગ કરેલા પ્રવચનો સાથેના "થ્રીડી વિકાસ રથ" સમગ્ર રાજયમાં જિલ્લે-જિલ્લે ભ્રમણ કરી રહ્યા છે અને અસંખ્ય સ્થાનો પર મુખ્યમંત્રી નરેન્દ્રભાઈ મોદીનો સંદેશો પહોંચાડી રહ્યા છે.

English summary

Narendra Modi will address 52 public meeting by 3D technology.