17મી લોકસભામાં સૌથી વધુ મહિલા સાંસદો, 78 મહિલા જીતી, કોંગ્રેસમાંથી ફક્ત સોનિયા ગાંધી

લોકસભા 2019ની ચૂંટણીના પરિણામ આવી ચૂક્યા છે સાથે જ 17મી લોકસભા કેવી હશે તેની તસવીર સ્પષ્ટ થઈ ચૂકી છે. આ વખતે ચૂંટણીમાં જ્યાં ભાજપને પ્રચંડ બહુમતી મળી છે

Updated: Wednesday, May 29, 2019, 11:20 [IST]

લોકસભા 2019ની ચૂંટણીના પરિણામ આવી ચૂક્યા છે સાથે જ 17મી લોકસભા કેવી હશે તેની તસવીર સ્પષ્ટ થઈ ચૂકી છે. આ વખતે ચૂંટણીમાં જ્યાં ભાજપને પ્રચંડ બહુમતી મળી છે, ત્યારે કોંગ્રેસ માત્ર 52 બેઠકો પર સમેટાઈ ગઈ છે. આ વખતે જીતનાર સાંસદોની લિસ્ટમાં મહિલાઓની સંખ્યા 78 છે. જેમાંથી 40 મહિલા સાંસદો ભાજપની ટિકિટ પર જીતી છે.78માંથી 27 મહિલા સાંસદો બીજી વાર જીત્યા છે. મહિલાઓની ભાગીદારીમાં યુપી અને બંગાળ આગળ છે, આ બંને રાજ્યોમાંથી 11-11 મહિલા સાંસદો ચૂંટાયા છે.

આ પણ વાંચો: પડદા પાછળના 5 ચહેરા જેણે મોદીને અપાવ્યો પ્રચંડ વિજય

17મી લોકસભામાં સૌથી વધુ 78 મહિલા સાંસદો

તમને જણાવી દઈએ કે લોકસભા ચૂંટણીમાં કુલ 8049 ઉમેદવારો મેદાનમાં હતા. તેમાં 724 મહિલા ઉમેદવારો હતા. હાલની લોકસભામાં મહિલા સાંસદોની સંખ્યા 64 છે. કોંગ્રેસે સૌથી વધુ 54 અને ભાજપે 53 મહિલા ઉમેદવારોને ચૂંટણી લડાવી હતી.

અપક્ષ મહિલા ઉમેદવારોની સંખ્યા હતી 222

અન્ય રાષ્ટ્રીય પક્ષોમાં બસપાએ 24, તૃણમુલ કોંગ્રેસે 23, માર્ક્સવાદી કમ્યુનિસ્ટ પાર્ટીએ 10, ભારતીય કમ્યુનિસ્ટ પાર્ટીએ 4, એનસીપીએ એક મહિલા ઉમેદવારને ટિકિટ આપી હતી. જ્યારે અપક્ષ મહિલા ઉમેદવારોની સંખ્યા 222 હતી.

સમૃતિ ઈરાનીએ રાહુલ ગાંધીને હરાવી રચ્યો ઈતિહાસ

આ વખતે કોંગ્રેસ અધ્યક્ષ રાહુલ ગાંધીને અમેઠીમાં હરાવનાર એક મહિલા જ છે. રાહુલ ગાંધીને ભાજપના સ્મૃતિ ઈરાહીને હરાવ્યા છે. તો બીજી તરફ કોંગ્રેસ તરફથી એક માત્ર મહિલા સાંસદ સોનિયા ગાંધી છે, જે રાયબરેલીથી જીત્યા છે. યુપીમાં કોંગ્રેસ આ એક જ બેઠક જીતી શકી છે. પ્રજ્ઞા ઠાકુરે પણ ભોપાલમાં દિગ્વિજયસિંહને મોટી લીડથી હરાવ્યા છે.

ચૂંટણી હારનારી મહિલા સાંસદ

ચૂંટણી હારનારી મહિલા ઉમેદવારોમાં સૌથી મોટું નામ સપા અધ્યક્ષ અખિલેશ યાદવના પત્ની ડિમ્પલ યાદવનું છે. ડિમ્પલ યાદવ ક્ન્નૌજ બેઠક પરથી હાર્યા, તો રામપુર બેઠક પરથી અભિનેત્રી જયાપ્રદાએ હાર સહન કરવી પડી. આસનસોલથી ટીએમસીના ઉમેદવાર મુનમુન સેન, સિલચરથી કોંગ્રેસની સુષ્મિતા દેવ, સુપૌલથી કોંગ્રેસની સંજીત રંજને પણ હારનો સામનો કરવો પડ્યો.

આ મહિલાઓ બીજીવાર જીતી

મથુરાથી હેમા માલિની, ચંદીગઢથી કિરણ ખેર, સુલ્તાનપુરથી મેનકા ગાંધી, મિર્ઝાપુરથી અપના દલની અનુપ્રિયા પટેલ, નવી દિલ્હીથી મિનાક્ષી લેખી ભાજપના પ્રમુખ મહિલા સાંસદો છે. આ તમામ સાંસદો બીજી વાર જીત્યા છે.

17મી લોકસભામાં સર્વાધિક મહિલા સાંસદો

મહિલા સાંસદોની સૌથી ઓછી સંખ્યા 9મી લોકસભામાં હતી. 9મી લોકસભામાં માત્ર 28 મહિલાઓ હતી જ્યારે આ વખતે 78 મહિલા સાંસદોએ નવો ઈતિહાસ રચ્યો છે. નવી લોકસભામાં મહિલા સાંસદોની સંખ્યા કુલ સંખ્યાના 14 ટકા છે.