ગુજરાત સહિતના આ રાજ્યો વરસાદની વધુ એક ઈનિંગ માટે તૈયાર રહે!
દેશમાં હવામાનમાં ફેરબદલ યથાવત છે. જો કે ચોમાસાએ ભારતના ઘણા રાજ્યોમાંથી વિદાય લીધી હોવા છતાં દેશના ઘણા પ્રાંત ભારે વરસાદથી પરેશાન છે.
નવી દિલ્હી, 10 ઓક્ટોબર : દેશમાં હવામાનમાં ફેરબદલ યથાવત છે. જો કે ચોમાસાએ ભારતના ઘણા રાજ્યોમાંથી વિદાય લીધી હોવા છતાં દેશના ઘણા પ્રાંત ભારે વરસાદથી પરેશાન છે. ભારતના હવામાન વિભાગના લેટેસ્ટ અપડેટમાં કહેવામાં આવ્યું છે કે પૂર્વ-મધ્ય અરબી સમુદ્ર ઉપર એક ચક્રવાતી પરિભ્રમણ છે, જે આગામી 3-4 દિવસ દરમિયાન તીવ્ર બને તેવી શક્યતા છે, જેના કારણે આંદામાન નિકોબાર અને મહારાષ્ટ્રમાં ભારે વરસાદની સંભાવના છે. હવામાન ખાતાનું કહેવું છે કે ઓક્ટોબર 12 થી 14 વચ્ચે કેરળમાં ભારે વરસાદ પડી શકે છે.
ઘણા રાજ્યોમાં હવામાન બદલાશે
બીજી તરફ ગુજરાત અને છત્તીસગઢના કેટલાક ભાગોમાંથી દક્ષિણ-પશ્ચિમ ચોમાસાને પરત ફરવા માટે પરિસ્થિતિઓ અનુકૂળ છે, જેના કારણે આ બે રાજ્યો ઉપરાંત મધ્યપ્રદેશ, ઝારખંડ, બિહારના મોટાભાગના વિસ્તારોમાં હળવાથી ભારે વરસાદની અપેક્ષા છે.
સમુદ્રમાં તોફાનની સ્થિતિ
હવામાનની માહિતી આપતી ખાનગી સંસ્થા સ્કાયમેટના જણાવ્યા મુજબ, દક્ષિણ-પશ્ચિમ ચોમાસુ સત્તાવાર રીતે સમાપ્ત થઈ ગયું છે. જો કે ચોમાસું પાછું ફરવાનું હજુ પૂર્ણ થયું નથી, તેથી વરસાદ ઓક્ટોબરના મધ્ય સુધી ચાલુ રહેશે. આ સાથે ભારતીય સમુદ્રમાં પણ તોફાની સ્થિતિ રહેશે. આ માટે એલર્ટ જારી કરવામાં આવ્યું છે.
ભારે વરસાદની સંભાવના
આગામી 24 કલાક દરમિયાન આંદામાન અને નિકોબાર ટાપુઓ, કર્ણાટક, કોંકણ-ગોવા, તમિલનાડુ, લક્ષદ્વીપ અને કેરળમાં હળવાથી મધ્યમ વરસાદની સંભાવના છે. જ્યારે આંધ્રપ્રદેશ, રાયલસીમા, તેલંગાણાના કેટલાક ભાગો અને દક્ષિણ મધ્ય મહારાષ્ટ્રમાં ભારે વરસાદની સંભાવના છે. મરાઠવાડા અને દક્ષિણ ગુજરાતના અલગ-અલગ ભાગોમાં પણ વરસાદ થઇ શકે છે.
ભારે પવન અને વીજળી પડવાની સંભાવના
રાજસ્થાનના પશ્ચિમ વિસ્તારો અને ગુજરાતના કચ્છ વિસ્તારમાં દિવસ ગરમ રહેશે અને ત્યાંનું હવામાન શુષ્ક રહેશે. જે સ્થળોએ ભારે વરસાદની સંભાવના છે ત્યાં વરસાદ દરમિયાન ભારે પવન અને વીજળી પડવાની સંભાવના છે.