દિલ્હીના કનોટ પ્લેસમાં ફાયરિંગ, એકની ધરપકડ

Published: Sunday, December 16, 2012, 14:30 [IST]

નવી દિલ્હી, 16 ડિસેમ્બર: દિલ્હીમાં સંસદ ભવનથી થોડાક જ કિલોમીટરના અંતર પર આવેલા કનોટ પ્લેસ વિસ્તારમાં ફાયરિંગ થયું છે. કનોટ પ્લેસના જૈન ઢાબા પાસે ઘણા રાઉન્ડ ફાયરિંગ થવાથી વિસ્તારમાં ચકચાર મચી જવા પામી છે. જોકે દિલ્હી પોલીસે આરોપીઓને ધરપકડ કરી તેમની પૂછતાછ આરંભી છે. આ ઘટના આજે સવારે 6.30 વાગ્યાની છે.

સૂત્રો દ્વારા મળતી માહિતી અનુસાર ખાવા-પીવાની બાબતને લઇને કેટલાક યુવકો વચ્ચે વિવાદ સર્જાયો હતો. પોલીસે રાજેશ નામના એક યુવકની ધરપકડ કરી છે અને તેની પૂછપરછ જારી છે. પોલીસના જણાવ્યા અનુસાર આ યુવક ઉત્તમનગરનો રહેનાર છે.

અત્રે ઉલ્લેખનીય છે કે જે વિસ્તારમાં ફાયરિંગ થયું છે ત્યાં ઘણી બધી હાઇ પ્રોફાઇલ ઓફિસ આવેલી છે, જણાવવામાં આવે છે કે ખાવા-પીવાની ચીજવસ્તુઓને લઇને સર્જાયેલા આંતરિક વિખવાદના કારણે આ ફાયરિંગ કરવામાં આવ્યું હતું.

ઢાબાની અંદર થયેલા આ ફાયરિંગમાં જોકે કોઇ જાનહાનિના સમાચાર નથી, કારણ કે આ ફાયરિંગ માત્ર હવામાં કરવામાં આવ્યું હતું. ફાયરિંગના કારણે ઢાબાની છતમાં કાણા પડી ગયા છે. પોલીસે ઘટનસ્થળેથી એક કાર અને .32 એમએમની એક પિસ્તોલ જપ્ત કરી છે. આ અંગે પોલીસે વધુ તપાસ હાથ ધરી છે.

Published On December 16, 2012