કનોટ પ્લેસમાં યુવતીની છેડતી, 4 વિદેશીઓની ધરપકડ

Published: Tuesday, January 8, 2013, 12:15 [IST]

નવી દિલ્હી, 8 જાન્યુઆરી: દેશની રાજધાની દિલ્હીમાં એકવાર ફરી છેડછાડની ઘટના સામે આવી છે. કનોટ પ્લેસમાં યમન દૂતાવાસની ગાડીમાં સવાર ચાર વિદેશી નાગરિકો પર ફાઇવ સ્ટાર હોટલની મહિલા કર્મચારીએ છેડતીનો આરોપ લગાવ્યો છે. આરોપ છે કે વિદેશી નાગરિકોએ તેમને અશ્લીલ ઇશારા કર્યા અને તેમની કારમાં ખેંચવાનો પ્રયત્ન કર્યો. ફરિયાદ કરતા પોલીસે આ વિદેશીઓની ધરપકડ કરી લીધી છે.

મહિલા કર્મચારીએ કનોટ પ્લેસના પોલીસ સ્ટેશનમાં ફરિયાદ કરતા પોલીસે ચારેય આરોપીઓની ધરપકડ કરી લીધી છે. તેમાંથી એક આરોપી યમનનો નાગરિક છે. બે લીબિયાનો અને એક અલ્જીરીયાનો નાગરિક છે. પોલીસના જણાવ્યા અનુસાર મહિલા હોટલમાં આસિસ્ટન્ટ ટ્રેનિંગ મેનેજર છે.

પોલીસે જણાવ્યું કે ફરિયાદી મહિલા દિલ્હીના જનપથ પર એક હોટલની સામે માર્ગ પર ઉભી હતી. દરમિયાનમાં એક કાર આવી અને તેમાં બેઠેલા ચાર વિદેશી યુવકોએ તેને કારમાં ખેંચવાની કોશિશ કરી. આ મહિલા ત્યાંથી ભાગીને પોલીસ સ્ટેશનમાં આ અંગે ફરિયાદ કરતા પોલીસે તાત્કાલિક ધોરણે ચારેય વિદેશીઓની ધરપકડ કરી લીધી છે.

આ મહિલાએ પોલીસને જણાવ્યું કે એક દુતાવાસની કારમાંથી ચાર લોકોએ તેને અશ્લીલ ઇશારા કર્યા અને ડરાવવાની કોશિશ કરી. યમની અને અલ્જીરીયાઇ નાગરિકોને ડિપ્લોમેટિક ઇમ્યૂનિટી મળેલ હોવાથી તેમને છોડી મૂકાયા અને લિબિયાના બે નાગરિકોને જામિન પર છોડી મૂકાયા છે.

Published On January 8, 2013