હવે પેટ્રોલ પંપ પર મળશે LPG સિલિંડર

Published: Wednesday, October 2, 2013, 18:00 [IST]

નવી દિલ્હી, 2 ઓક્ટોબર : દેશના મેટ્રો સિટીમાં હવે કેટલાક ખાસ પંસદ કરવામાં આવેલા પેટ્રોલ પંપ પર હવેથી રાંધણ ગેસ એટલે કે એલપીજી ગેસ સિલિન્ડર ઉપલબ્ધ બનશે. પેટ્રોલિયમ મંત્રાલયે આ છુટક વેચાણ કેન્દ્રો પર 5 કિલોગ્રામનું સિલિન્ડર વેચવાની અનુમતી આપી દીધી છે. પેટ્રોલિયમ મંત્રાલયે એલપીજી કનેક્શનની એજન્સી બદલવા માટે પોર્ટેબિલિટીની પણ શરૂઆત કરી છે. ગેસ વપરાશકાર આ કામ કોમ્પ્યુટર પર એક બટન દબાવીને કરી શકે છે.

પેટ્રોલિયમ મંત્રાલય દ્વારા જાહેર કરવામાં આવેલી આ માહિતી અનુસાર 5 કિલોગ્રામનો એલપીજી સિલિન્ડર હવે દેશના મહાનગરોમાં કંપની દ્વારા સ્વયં ચલાવવામાં આવનારા પેટ્રોલ પંપ (કોકો) પંપ પર ઉપલબ્ધ રહેશે. સમગ્ર દેશમાં કંપનીઓ દ્વારા સ્વયંસંચાલિત પેટ્રોલ પંપોની સંખ્યા માત્ર ત્રણ ટકા છે. વર્તમાન સમયમાં દેશમાં કુલ 47,000 પેટ્રોલ પંપ છે.

આ સિલિન્ડરનું વેચાણ બજાર મૂલ્ય મુજબ કરવામાં આવશે. હાલ 14.2 કિલોગ્રામના ઘરેલુ સિલિન્ડર સબસીડી અનુસાર રૂપિયા 410 અને સબસીડી વગર બમણી કિંમતે ઉપલબ્ધ છે. પેટ્રોલિયમ મંત્રી વીરપ્પા મોઇલી બેંગલોરમાં પેટ્રોલ પંપ પર 5 કિલોગ્રામવાળા એલપીજી સિલિન્ડરના વેચાણની શરૂઆત કરાવશે. બેંગલોર ઉપરાંત આ સુવિધા દિલ્હી, મુંબઇ, કોલકત્તા અને ચેન્નાઇમાં ઉપલબ્ધ બનશે.

Published On October 2, 2013