જામનગરનો ઝટકોઃ ભત્રીજી સામે કાકાએ સ્વિકારી હાર

ગાંધીનગર, 2 મેઃ ગુજરાતમાં લોકસભાની ચૂંટણી માટે થયેલા સાતમા તબક્કાના મતદાનને હજુ બે જ દિવસ પસાર થયા છે અને પરિણામ આવવાને હજુ 14 દિવસની વાર છે, તે પહેલા જ કોંગ્રેસ માટે જામનગર બેઠક તરફથી એ મોટ ઝટકો આપવામાં આવ્યો છે. જામનગર બેઠકના ઉમેદવાર વિક્રમ માડમે પોતાની ભત્રીજી પૂનમ માડમ સામે હારનો સ્વિકાર કરી લીધો છે.

રાજકોટના એક સ્થાનિક સાંધ્ય સમાચાર પત્ર આજકાલના અહેવાલ અનુસાર તેમણે કહ્યું છેકે હું ત્રીસેક હજાર મતથી હારીશ, આ મારી હતાશા નથી, પરંતુ હું વાસ્તવિકતાનો સ્વિકાર કરવાનું કલેજું ધરાવું છું. આજના સ્વાર્થથી ભરેલા સમાજને કદાચ સિદ્ધાંતોની જરૂર રહી નથી.

તેમણે વધુમાં કહ્યું કે, મારા પ્રેમમાં ક્યાંક કચાશ રહી ગઇ હશે, મારા તમામ કાર્યકર્તાઓનો હું દીલથી આભાર માનું છું, મારા લાખો શુભેચ્છકો કે જેમણે મને મત આપ્યો છે તેમનો પણ હું આભાર વ્યક્ત કરું છું. જે સમયની સાથે ચાલતો નથી એ ફેંકાય જાય છે. હું સિદ્ધાંતને વરેલો છું અને આ સ્વાર્થથી ભરેલા સમાજમાં સિદ્ધાંતોની કોઇ કિંમત નથી, આજના સમયમાં મારી વાત બંધ બેસતી નથી.

નોંધનીય છેકે વિક્રમ માડમ જામનગર બેઠક પર છેલ્લી બે ટર્મથી ચૂંટાતા આવ્યા છે. જામનગરમાં 60.14 ટકા મતદાન થયું છે અને વિક્રમ માડમ સામે ભાજપે તેમની જ ભત્રીજી પૂનમ માડમને ઉભી રાખીને મોટો દાવ ખેલ્યો હતો.

English summary

congress candidate and mp vikram madam says he will defeat in jamnagar by nearly 30 thousand vote against bjp candidate and his nephew poonam madam.