કોંગ્રેસમાં ફરીથી કકળાટ, કિરીટ પટેલે દંડક પદેથી રાજીનામુ આપવાની જાહેરાત કરી

By Desk

Updated: Tuesday, December 30, 2025, 14:19 [IST]

ગુજરાત કોંગ્રેસમાં આંતરિક વિવાદ ચરમસીમાએ છે. પાટણના ધારાસભ્ય કિરીટ પટેલે પક્ષના દંડક પદેથી રાજીનામું આપવાની જાહેરાત કરી છે. પોતાની અવગણના અને પક્ષમાં થયેલી ખોટી નિમણૂકોથી નારાજગી વ્યક્ત કરતા તેમણે આવતીકાલે આ પદ છોડવાની જાહેરાત કરી છે.

કિરીટ પટેલે પ્રદેશ નેતૃત્વ સામે મોરચો ખોલ્યો છે. પાટણમાં અનુસૂચિત જાતિ મોરચાના પ્રમુખની નિમણૂકથી તે નારાજ છે. તેમણે ચીમકી આપી છે કે જો તેમની વાત સાંભળવામાં નહીં આવે તો કડક પગલું લેશે. માંગણીઓ ન સંતોષાતા આવતીકાલે તેઓ દંડક પદેથી વિધિવત રાજીનામું આપશે.

કિરીટ પટેલે સાચા કાર્યકરોની કદર ન થતી હોવાનો આક્ષેપ કર્યો છે. પ્રદેશ નેતાગીરી પર પ્રહાર કરતા મીડિયાને જણાવ્યુ કે, ચૂંટણીમાં જે લોકોએ મને હરાવવા માટે રાત-દિવસ એક કર્યા હતા, તેમને જ આજે સંગઠનમાં મોટા હોદ્દા આપવામાં આવી રહ્યા છે. ચૂંટાયેલા જનપ્રતિનિધિઓને વિશ્વાસમાં ન લેવાતા નિર્ણયો પર રોષ ઠાલવ્યો છે. છેલ્લા એક મહિનાથી માત્ર વાયદા અપાઈ રહ્યા છે, નક્કર પગલાં લેવાયા નથી.

કિરીટ પટેલે માત્ર રાજીનામાની વાત નથી કરી, પરંતુ પરિસ્થિતિ વણસી શકે તેવો ઈશારો આપ્યો. તેમણે જણાવ્યું કે પાટણ કોંગ્રેસના પાયાના કાર્યકરો આ નિર્ણયોથી ગુસ્સામાં છે. જો સમસ્યાનો ઉકેલ નહીં આવે તો નારાજ કાર્યકરો તોડફોડ કરતા પણ નહીં અચકાય. જો પ્રદેશ નેતાઓ ગંભીર નહીં બને, તો પાટણ જેવી આગ અન્ય શહેરોમાં પણ ફેલાઈ શકે છે.

એક તરફ કિરીટ પટેલે રાજીનામાનું શસ્ત્ર ઉગામ્યું છે, તો બીજી તરફ પ્રદેશ પ્રમુખ અમિત ચાવડા ડેમેજ કંટ્રોલના પ્રયાસમાં લાગ્યા છે. તેમણે સ્વીકાર્યું કે SC વિભાગની નિમણૂકને લઈને અસંતોષ છે, પરંતુ તેને ઘરનો આંતરિક મામલો ગણાવ્યો. ચાવડાએ દાવો કર્યો કે બંને જૂથોને સાથે બેસાડી આ વિવાદનો સુખદ અંત લાવવામાં આવશે.