સ્પેસ સાયન્સ પ્રેરણાદાયી અને ઉત્તેજક છે : ડૉ. કિરણ કુમાર

અમદાવાદ, 9 ઑક્ટોબર : સાયન્સ સિટી ખાતે શરૂ થયેલા બે દિવસના "મીટેરોલોજિકલ સેટેલાઇટ કલ્પના-1 : દેશની સેવાના 10 વર્ષ" વિષય પરના કાર્યક્રમમાં સોમવારે, 8 ઑક્ટોબર, 2012ના રોજ સેક (સ્પેસ એપ્લિકેશન સેન્ટર) અમદાવાદના ડાયરેક્ટર ડૉ. એ એસ કિરણ કુમારે સ્પેસ એક્સપ્લોરેશન અંગેના પોતાના વિચારો વ્યક્ત કરતા જણાવ્યું હતું કે સ્પેસ એક્સપ્લોરેશન અને ડિવલપમેન્ટ ખૂબ શક્તિશાળી વિષય છે. આ વિષયો વિદ્યાર્થીઓને નવું શીખવામાં વ્યસ્ત રાખે છે અને તેઓ જે શીખ્યા છે તે જીવનપર્યંત તેમની સાથે રાખવામાં મદદરૂપ બને છે.

સાયન્સ અને સ્પેસ પ્રોગ્રામ અંગે વિદ્યાર્થીઓમાં જાગૃતિ આવે તેવા હેતુ સાથે યોજાયેલા કાર્યક્રમાં ગુજરાતના તમામ જિલ્લાઓમાંથી વિદ્યાર્થીઓ અને શિક્ષકોએ હાજરી આપી હતી. ખીચોખીચ ભરેલા હોલમાં ડૉ. કિરણ કુમારે જણાવ્યું કે "સામાજિક વિકાસને સમજવા માટે અવકાશ અંગેની માહિતી અને તે માટે વાપરવામાં આવતી ટેકનોલોજીને સમજવી ખૂબ જરૂરી છે. કલ્પના મેટસેટ ઉપગ્રહે આપણા વાતાવરણને સમજવામાં ઘણી મદદ કરી છે. તે દર અડધા કલાકે આપણને હવામાન અંગેની માહિતી મોકલે છે. જેના કારણે હવામાનની આગાહી કરવી શક્ય બની છે."

આ પ્રસંગે કલ્પના મેટસેટ પર તૈયાર કરવામાં આવેલું દસ્તાવેજી ચિત્ર દર્શાવવામાં આવ્યું હતું. બે દિવસની કાર્યશિબિરમાં ઇસરોના વિજ્ઞાનીઓએ રૂબરૂ ઉપસ્થિત રહી વિદ્યાર્થીઓને રસપ્રદ માહિતી પુરી પાડી હતી. આ પ્રસંગે સ્પેસ ફોર એજ્યુકેશન વિષય અંગે ચર્ચા કરવામાં આવી હતી. વિદ્યાર્થીઓ માટે વિવિધ સ્પર્ધાઓનું આયોજન પણ કરવામાં આવ્યું હતું.

English summary

Space exploration and development are powerful subjects for engaging students, motivating them to learn and helping them retain what they have learned,expressed Dr. A. S. Kiran Kumar, Director, Space Applications Center. Ahmedabad.