બ્રહ્મપુત્રાનું પાણી ડાયવર્ટ કરવા ચીન બનાવશે સૌથી લાંબી સુરંગ
ચીનને ફરી બતાવી પોતાની અવળચંડાઇ. બ્રહ્મપુત્રા નદીના પાણીને પોતાની તરફ વાળવા બનાવશે સૌથી લાંબી સુરંગ. આ અંગે વધુ વાંચો અહીં.
છેલ્લા કેટલાયે સમયથી ભારત અને ચીન વચ્ચે કોઇ ને કોઇ વાતે તાણદાયક પરિસ્થિતિ જોવા મળી છે. અનેક વિવાદો વચ્ચે હવે ચીન એક નવી જ તૈયારીમાં લાગી ગયું છે. ચીનની આ નવી યોજનાથી ચોક્કસ જ ભારતને હેરાનગતિ થશે. ચીન એક સુરંગ બનાવવાની યોજના બનાવી રહ્યું છે, તેની યોજના બ્રહ્મપુત્રાના પાણીની દિશા બદલાવાની પણ છે. ટીઓઆઇના અહેવાલો અનુસાર, ચીન પોતાના દેશના ઉત્તર-પૂર્વમાં બ્રહ્મપુત્રા નદીના પાણીને શિનજિયાંગ પ્રાંતના ઉજ્જડ વિસ્તારમાં ડાયવર્ટ કરવા માંગે છે.
વિશ્વની સૌથી લાંબી સુરંગ
આ માટે ચીન 1000 કિલોમીટર લાંબી સુરંગ બનાવવાની યોજના બનાવી રહ્યું છે. આ દુનિયાની સૌથી લાંબી સુરંગ હશે. ચીનની આ યોજના બંને દેશો વચ્ચે નવા વિવાદને જન્મ આપી શકે છે. ચીને હજુ સુધી આ યોજના પર કામ શરૂ નથી કર્યું, પરંતુ આ માટેનો અભ્યાસ શરૂ થઇ ચૂક્યો છે. ચીનના એન્જિયરો યારલુંગ જાંગ્બોનું પાણી તિબેટથી શિનજિયાંગ લઇ જવા માટેની ટેક્નિકનું પરીક્ષણ કરી રહ્યાં છે. એન્જિનિયરનું કહેવું છે કે, આ પ્રસ્તાવિત સુરંગ શિનજિયાંગના વિકાસમાં મહત્વપૂર્ણ સાબિત થશે. ચીનની આ નવી યોજનાથી તિબેટની પઠાર નદીનો પ્રવાહ પણ પ્રભાવિત થાય એવી શક્યતા છે. ચીન જો બ્રહ્મપુત્રાના પ્રવાહની દિશા બદલે તો, એને કારણે ભારતના ઉત્તર-પૂર્વ વિસ્તાર અને બાંગ્લેદેશમાં પાણીનો પ્રવાહ ખૂબ ઓછો થવાની કે પૂર આવવાની પણ શક્યતા છે.
Click it and Unblock the Notifications
Sign in with Google
