મુશર્રફની રાજનૈતિક કારકિર્દી પર લાગ્યું આજીવન ગ્રહણ!

ઇસ્લામાબાદ, 1 મે: પાકિસ્તાનના પૂર્વ રાષ્ટ્રપતિ અને આર્મી ચીફ પરવેઝ મુશર્રફની હવે રાજનૈતિક કારકિર્દી ખતમ થઇ ગઇ છે. પાકિસ્તાનની પેશાવર હાઇ કોર્ટે મુશર્રફ પર આજીવન પ્રતિબંધ લગાવી દીધો છે. મુખ્ય ન્યાયાધીશ દોસ્ત મોહમ્મદ ખાનની અધ્યક્ષતામાં પેશાવર હાઇ કોર્ટની ચાર સભ્યોવાળી ખંડપીઠે ઉમેદવારીપત્ર રદ કરી દેવાના નિર્ણયને પડકારનાર મુશર્રફની અરજીને રદ કરતા આ પ્રતિબંધ લગાવ્યો છે. તેમના પર આ પ્રતિબંધ સંવિધાનને બે વખત રદ કરવા અને 2007માં ઇમરજન્સી લગાવવા દરમિયાન 60 જજોને નજરકેદ કરવા બદલ લગાવાયો છે.

કોર્ટે આ નિર્ણય બાદ હવે મુશર્રફ પ્રાંતીય, નેશનલ એસેમ્બલી અને સેનેટની ચૂંટણી લડી શકશે નહીં. આ પહેલા 11 મેના રોજ યોજાનાર ચૂંટણીમાં તેઓ 4 સંસદીય બેઠક- ચિત્રાલ, કરાચી, કસૂર અને ઇસ્લામાબાદમાંથી ચૂંટણી લડવાનું મન બનાવી રહ્યા હતા, પરંતુ હવે તેઓ આવું કરી શકશે નહીં.

કોર્ટે ઓલ પાકિસ્તાન મુસ્લીમ લીગના અધ્યક્ષ મુશર્રફને 11 મેના રોજ યોજાનારી સામાન્ય ચૂંટણીમાં નજરકેદ રાખવાનો પણ આદેશ આપ્યો છે. જ્યારે ભુટ્ટો હત્યાકાંડ મામલામાં તેમને 14 દિવસની ન્યાયિક તપાસમાં મોકલી દેવામાં આવ્યા છે. તેમને ઇસ્લામાબાદના બાહરી વિસ્તાર શક શહઝાદમાં આવેલા તેમના ફાર્મહાઉસમાં રાખવામાં આવશે.

અત્રે ઉલ્લેખનીય છે કે તેમના ફાર્મહાઉસને પહેલેથી જ ઉપજેલ તરીકે જાહેર કરવામાં આવેલું છે. તપાસ પૂરી થયા બાદ એફઆઇએ તેમની ધરપકડ સમયમર્યાદા વધારવાની માગ નહી કરે. મામલાની સુનવણી હવે 14 મેના રોજ થવાની છે. પૂર્વ પ્રધાનમંત્રી બેનજીર ભુટ્ટોની ડિસેમ્બર 2007માં એક રેલી દરમિયાન હત્યા કરી દેવામાં આવી હતી. મુશર્રફ પર ભુટ્ટોને પૂરતી સુરક્ષા નહીં આપવાનો આરોપ છે.

English summary

Pakistan court bans former ruler Pervez Musharraf from office for life. pakistan, high court, pervez musharraf, election, પાકિસ્તાન, રાષ્ટ્રપતિ, પરવેઝ મુશર્રફ, રાજનૈતિક કારકિર્દી, પેશાવર હાઇ કોર્ટ, પ્રતિબંધ