ફરી લાગી ઇંધણમાં આગ, પેટ્રોલમાં 41 અને ડીઝલમાં 10 પૈસાનો વધારો

Updated: Saturday, December 21, 2013, 11:26 [IST]

નવી દિલ્હી, 21 ડિસેમ્બર: સરકાર દ્વારા પેટ્રોલ પંપ ડીલરોનું કમીશનમાં વધારો કરવા પેટ્રોલમાં 41 પૈસા અને ડીઝલમાં 10 પૈસા પ્રતિ લીટરમાં વધારો કરવામાં આવ્યો છે. પેટ્રોલ અને ડીઝલના ભાવોમાં વધારો શુક્રવારે મધ્ય રાત્રિથી લાગુ થઇ ચૂક્યો છે. આ વધારામાં સ્થાનીય વેટ સામેલ નથી.

ડોલરની સરખામણીએ રૂપિયાની કિંમતમાં ઘટાડો થવા છતા સાર્વજનિક ક્ષેત્રની પેટ્રોલિયમ કંપનીઓએ છેલ્લા સાત અઠવાડિયાથી ઇંધણના ભાવ વધાર્યા ન્હોતા. તેમણે પેટ્રોલ પર કમીશનમાં 21 પૈસાના વધારાની સરકારની પરવાનગી બાદ 20 પૈસા જોડીને 41 રૂપિયાનો વધારો કરી દીધો.

દિલ્હીમાં પેટ્રોલના ભાવ હાલમાં 71.02 રૂપિયા પ્રતિ લિટર છે, જે ભાવ વધારા બાદ 71.51 પૈસા પ્રતિ લિટર થઇ ગયું છે. જોકે પેટ્રોલની કિંમતો દરેક શહેર પ્રમાણે જુદી જુદી હશે. આ ઉપરાંત દિલ્હીમાં ડીઝલના ભાવ 53.67 રૂપિયા પ્રતિ લિટરથી વધીને હવે 53.80 રૂપિયા પ્રતિ લિટર થઇ ગઇ છે.

ઇન્ડિયન ઓઇલ કોર્પોરેશને જણાવ્યું કે પેટ્રોલ પંપ ડીલરોનું ડીઝલ પર કમીશન 1089 રૂપિયા પ્રતિ કિલોલિટરથી વધારીને 1186 રૂપિયા પ્રતિ કિલોલીટર કરવામાં આવ્યું છે. જ્યારે પેટ્રોલ પર ડીલરોનું કમીશન 21 પૈસાથી વધારી 1.95 રૂપિયા પ્રતિ લીટર કરવામાં આવ્યું છે.