આજે મોદીની હાજરીમાં રાદડિયા પિતા-પુત્ર ભાજપમાં જોડાશે

રાજકોટ, 8 માર્ચ: કોંગ્રેસના પૂર્વ સાંસદ અને સૌરાષ્ટ્રના ખેડૂતોના નેતા વિઠ્ઠલ રાદડિયા અને તેમના પુત્ર જયેશ રાદડિયા આજે શુક્રવારે ધોરાજીના કોલેજ ગ્રાઉન્ડમાં જિલ્લા ભાજપ દ્વારા આયોજિત કાર્યક્રમમાં વિધિવત રીતે ભાજપમાં જોડાશે. રાદડિયાની સાથે તેમના ટેકેદાર એવા અનેક કોંગ્રેસી અગ્રણીઓ પણ કેસરિયો ખેસ ધારણ કરશે. આ પ્રસંગે ગુજરાત ભાજપના ટોચના અગ્રણીઓ, મંત્રીઓ, કાર્યકર્તાઓ હાજર રહેશે. વિઠ્ઠલ રાદડિયા એક ટોલનાકા પર બંદૂક તાકવાના મુદ્દે ગત વર્ષે ચર્ચામાં રહ્યાં હતા.

વિઠ્ઠલ રાદડિયા ભૂતકાળમાં કોંગ્રેસના ઉમેદવાર તરીકે લોકસભા અને વિધાનસભાની ચુંટણીમાં જીત મેળવી ચુકેલા છે. તેમને તાજેતરમાં જ ધારાસભ્ય પદેથી રાજીનામું આપ્યું છે. અને તેમના પુત્ર જયેશ રાદડિયા પણ પોતાના પદેથી રાજીનામું આપી ચુક્યાં છે. તેમને તાજેતરમાં પોરબંદર અને જુનાગઢ જિલામાં પોતાના સમર્થકો સાથે બેઠક યોજી હતી.

સૌરાષ્ટ્રના રાજકારણમાં પરિવર્તનનો પવન ફૂંકાઇ રહ્યો છે. તાજેતરમાં યોજાયેલી વિધાનસભાની ચુંટણીમાં કોંગ્રેસના એક મજબૂત નેતા તરીકે ઓળખાતા વિઠ્ઠલ રાદડિયાએ તેમને કોંગ્રેસમાં તેમની સાથે અન્યાય થઇ રહ્યો હોવાનો આરોપ લગાવી કોંગ્રેસ સાથે છેડો ફાડી દિધો છે, વિઠ્ઠલ રાદડિયાના ભાજપમાં જોડાવાના નિર્ણયથી કોંગ્રેસને ભારે ફટકો પડ્યો છે. ખાસ કરીને રાજકોટ જિલ્લામાં કોંગ્રેસના સૂપડાં સાફ થઇ ગયા હોય તેવી સ્થિતિ નિર્માણ પામી છે. આગામી ટૂંક સમયમાં પોરબંદર બેઠકની લોકસભાની ચૂંટણી પણ યોજાવવાની છે અને તે ચૂંટણીમાં પણ રાદડિયા કોંગ્રેસ માટે માથાના દુખાવારૂપ સાબિત થઇ શકે છે.

અત્રે ઉલ્લેખનીય છે કે વિઠ્ઠલભાઇને કેન્‍દ્રીય મંત્રીમંડળમાં નહી સમાવતા અને વિધાનસભામાં વિપક્ષી નેતા પણ નહીં બનાવતા પક્ષ પ્રત્યે તેમની ઉદાસીનતામાં વધારો થયો હતો. આ દરમિયાનમાં ભાજપે બન્ને પિતા-પુત્રને ભાજપમાં યોગ્ય સ્થાન આપવાના આમંત્રણ આપ્યું હતું. ત્યારે રાદડિયાબંધુએ ભાજપમાં જોડાવવાનો નિર્ણય કરી લીધો હતો. તેમના ભાજપમાં જોડાતા કોંગ્રેસને જોરદાર ફટકો પડશે.

English summary

Former Congress MP and farmers' leader from Saurashtra Vitthal Radadia, would be joining BJP in the presence of Narendra Modi at a function at Dhoraji on Friday.