રિયલ એસ્ટેટ પર આવકવેરા વિભાગની રેડ, 100 કરોડની જાહેર ન થયેલી આવકનો પર્દાફાશ
મહારાષ્ટ્રના નાસિકમાં આવકવેરા વિભાગે રિયલ એસ્ટેટના વ્યવસાયમાં રોકાયેલા ઉદ્યોગપતિના પરિસરમાં રેડ કર્યા અને 100 કરોડથી વધુની બિનહિસાબી આવક મળી. IT અધિકારીઓએ વેપારી પાસેથી 24 કરોડ રૂપિયાથી વધુ રોકડ જપ્ત કરી છે.
નાસિક : મહારાષ્ટ્રના નાસિકમાં આવકવેરા વિભાગે રિયલ એસ્ટેટના વ્યવસાયમાં રોકાયેલા ઉદ્યોગપતિના પરિસરમાં રેડ કર્યા અને 100 કરોડથી વધુની બિનહિસાબી આવક મળી. IT અધિકારીઓએ વેપારી પાસેથી 24 કરોડ રૂપિયાથી વધુ રોકડ જપ્ત કરી છે. કેન્દ્રીય નાણાં મંત્રાલયે સોમવારે આ માહિતી આપી હતી. જણાવવામાં આવી રહ્યું છે કે, આરોપી રિયલ એસ્ટેટ બિઝનેસમાં લેન્ડ એગ્રીગેટર તરીકે કામ કરતો હતો. રેડ દરમિયાન ઘણા મહત્વના દસ્તાવેજો પણ મળી આવ્યા છે.
અપ્રમાણસર સંપત્તિ અને આવકવેરાની ચોરીના કિસ્સામાં આવકવેરા વિભાગ (ITD) ઘણી જગ્યાએ રેડ પાડી રહી છે. આ ક્રમમાં રિયલ એસ્ટેટ સાથે સંકળાયેલા જમીન એગ્રીગેટર પાસે બિનહિસાબી સંપત્તિઓ શોધી કાઢવામાં આવી હતી, ત્યારબાદ IT અધિકારીઓએ આ કાર્યવાહી કરી હતી. આરોપીની ઓળખ જાહેર કરવામાં આવી નથી, પરંતુ તેના કબ્જામાંથી કરોડો રૂપિયાની રોકડ અને અઘોષિત સંપત્તિ મળી આવી છે. નાણાં મંત્રાલયના જણાવ્યા અનુસાર આવકવેરા વિભાગ દ્વારા 21 ઓક્ટોબરના રોજ આ રેડ કરવામાં આવ્યા હતા.
કેન્દ્રીય નાણાં મંત્રાલયે જણાવ્યું છે કે, આ સર્ચ ઓપરેશનમાં અત્યાર સુધીમાં 100 કરોડ રૂપિયાથી વધુની બિનહિસાબી આવક મળી આવી છે. એકત્ર કરાયેલા પુરાવાની તપાસ કરવામાં આવી રહી છે અને વધુ તપાસ ચાલુ છે. મીડિયા અહેવાલો અનુસાર અત્યાર સુધીમાં રૂપિયા 23.45 કરોડની અઘોષિત રોકડ અને ઘણા મહત્વના દસ્તાવેજો જમીન એકત્રીકરણ કરનાર પાસેથી જપ્ત કરવામાં આવ્યા છે. આ કેસમાં હવે મોટી જમીનની ખરીદીમાં બિનહિસાબી આવકનું રોકાણ કરનાર મુખ્ય વ્યક્તિઓની પણ શોધખોળ હાથ ધરવામાં આવી છે.
આમાંના ઘણા લોકો મહારાષ્ટ્રના પિંપલગાંવ બસવંત પ્રદેશમાં ડુંગળી અને અન્ય પાકના જથ્થાબંધ વેપાર સાથે સંકળાયેલા છે. તેમની પાસેથી રોકડ વ્યવહારોના રેકોર્ડ સહિતના ગુનાહિત પુરાવા પણ મળી આવ્યા છે. આઈડી અધિકારીઓએ પુરાવા જપ્ત કરીને આગળની કાર્યવાહી શરૂ કરી છે.