ઇસ્લામાબાદ પોલીસે તાહિલ ઉલ કાદરી સામે કેસ નોંધ્યો

ઈસ્લામાબાદ, 16 જાન્યુઆરી : પાકિસ્તાનમાં છેલ્લા બે દિવસથી જાહેરમાં દેખાતા અને ચર્ચાનું કેન્દ્ર બનેલા તાહિર ઉલ કાદરી સામે ફરિયાદ નોંધાઇ છે. મિન્હજુલ કુરાન ઈન્ટરનેશનલ (MQI)ના વડા ડૉ. તાહિર ઉલ કાદરી અને તેમના સમર્થકો સામે ઈસ્લામાબાદ પોલીસે કોર્ટમાં એફઆઈઆર નોંધી છે.

આ તમામની સામે પોલીસે હત્યાના પ્રયાસો, સરકારી બાબતોમાં દખલગીરી કરવી, સમાજમાં શાંતિમાં ખલેલ પહોંચાડવાની કલમો લગાડી છે. આ એફઆઈઆર ઈન્સ્પેક્ટર અયૂબ એહમદની હાજરીમાં નોંધવામાં આવી હતી.

ઉલ્લેખનીય છે કે પાકિસ્તાનના વડાપ્રધાન દ્વારા આચરવામાં આવેલા ભ્રષ્ટાચારના મુદ્દે પાકિસ્તાનની સર્વોચ્ચ અદાલતે આપેલા ધરપકડના આદેશ બાદ કાદરીના નેતૃત્વ હેઠળ ઈસ્લામાબાદમાં વિરાટ રેલી યોજવામાં આવી હતી. આ રેલી આજે બુધવારે ત્રીજા દિવસે પણ ચાલુ રહી છે. સંસદભવન નજીક યોજવામાં આવેલી આ રેલીમાં લાખો લોકો એકત્ર થયા છે.

મંગળવારે પોતાના આગઝરતા ભાષણમાં કાદરીએ દેશની દુર્દશા માટે સત્તા પર આવેલી એક પછી એક સરકારને દોષી ગણાવી છે. વર્ષ 2008માં પાકિસ્તાન પીપલ્સ પાર્ટી ચૂંટણી જીતીને સત્તા પર આવી તે પછી ઈસ્લામાબાદમાં તેની વિરુદ્ધ કરાયેલો આ સૌથી મોટું વિરોધ પ્રદર્શન છે.

English summary

Islamabad police file case against Tahir Ul Qadri.